Amazon首季業績除AWS之外就只有AWS，收入按年升37%至184億美元，賺65億。過去12個月總共671億美元，毛利率大致30％樓上。當係一間獨立公司去睇的話，大約就等於3份1間微軟，又或者你可以話AWS值最少7,000億以上，大約就係半間Amazon。
問題就係另一半Amazon幾多呢？北美以及國際部份好景時，已經係搞手但求打個和，今季更分別要蝕16億及12億。再加埋有投資Rivian部份，賬面輸76億。最終今季Amazon虧損38億。
即使電商業務當中有高毛利的廣告業務幫手，收入按年升23％至到近79億。反映電商生意好難做，尤其是疫情過後增長放緩，但支出就不停增加。新任CEO Andy Jassy講法就話，今日開始不再追求擴展人手物力，轉為改善物流效率及生產力，有信心以前做到今次都一樣做到。
管理層最後不忘將件事帶返去通脹及供應鏈緊張等因素上面。客觀環境雖然係困難，亦都係合理解釋，不過當Amazon蝕錢時都仍然印近104億價值股票作獎勵，股權較一年前5.18億股攤薄至5.23億股。
拉闊個畫面，拎埋微軟及Google的Big Tech去睇，今季cloud業務繼續無視經濟背景，持續交出3成樓上增長，可以話係最值得長線留意的概念。