美股長周末返嚟，市況繼續就通脹議題發酵，10年債息一度抽升上1.85厘，2年期債息突破1厘。納指期貨就住加息預期升溫跌曾近2%，標指期貨亦要插1%。
為通脹火上加油嘅仲有布油創14年後高位，高見88元，年內升幅達12%，原因包括供應短缺以及地緣政治因素。高盛就睇2022年第3季油價會升上100美元。
兩大主題之下，能源ETF(XLE)及金融ETF(XLF)成最安全板塊，盤前時段造好。大型油股BP、XOM及RDS均升約1%。
返返去主導指數嘅科技股方面，盤前跌幅暫時未見驚嚇，FAANG均跌1至1.5%左右。一沉百踩嘅係美銀2022年1月份基金經理調查，反映資金追銀行，投資者倉位按月增逾兩成，而棄科技股倉位跌20%。
美銀報告同時講對上一次出現集體意見（見圖），認為價值股跑贏增長股時間為︰09年5月、14年8月、21年5月。翻睇當時納指走勢，共通點都係科技股見底。
