關於美國禁止俄羅斯石油取態，醞釀一個周末後，白官釋出訊息表示考慮緊，據報總統拜登計劃拉埋歐洲盟友一齊實施禁運。
根據EIA數據，俄羅斯係世界第3大產油國，每日可以生產1150萬桶油，概念係佔全球每日消耗大約1億桶油的1成。石油交易員賭緊今個月油價有機會突破200美元，ICE布蘭特期油的$200買入期權開始有炒作，由唔夠1美元炒高至2.5美元水平。
Elon Musk就加多句話歐洲應該重啟核電廠，並且推高現有核電廠產能，對國家及國際安全至關重要，仲話任你揀個污染得最差地方，唔介意食當地農產品。
返返去股票市場的話，股神畢菲特就繼續從西方石油(OXY)入手，上周五接連公開兩份SEC文件顯示，巴郡狂掃9,120萬股OXY，其中的6,000萬股OXY係上周三至周五其間買入，買入價介乎47至56美元之間。
2019年巴郡投資100億美元買入OXY特別股，幫手收購Anadarko Petroleum，根據當時協議巴郡獲得的特別股有8厘息，再加8390萬股認股權證warrents，行使價為59.6美元，以今日現價61.5美元計，賬面多咗1.6億美元。
而另一邊，著名投資者Carl Icahn就選擇離場，畢竟係趁住OXY股價於2020年3月崩潰時入貨，將持股從2.5%拉高至10%，WSJ指Carl Ichan從中賺咗10億美元。