舖睇得明|金鷹Deal后「串燒連」|鄭得明

|

Pat在舖位界為人津津樂道嘅事跡,當然唔只扯單扯到人地報警咁少啦。話說順利完成梁伯單deal之後,Pat繼續氣勢如虹,某日我剛食完晏回公司途中,在樓下遠遠望見佢正金睛火眼望着手機,唸唸有詞。心想:等我望下你睇咩咁入神先!

「咁聚精會神望乜嘢呀,係咪梁伯又搵你去飲茶呢?」,我一邊問再一路睇佢手機上的訊息。

「行家又有經紀開咗單喇!你睇!」,Pat將部iPhone向着我,好緊張地回應。

「恭喜型男Leslie極速又開買賣一宗,完成今個月第二單買賣,下刪100字……」原來又係行家另一位經常爆數嘅新晉金牌sales,外貌有點像巴治奥、叫Leslie嘅靚仔開咗單。

「我都要再加大馬力,行快啲先得啦,否則啲筍盤畀人賣晒點算?」Pat喃喃自語地說。

回到公司後,Pat依然不停衝入我房問某個舖應該幾錢才有人買?推畀邊個貴客會啱佢口味?我就順道試探問:「點解你咁特別嘅,通常sales都係搵放賣緊嘅舖位去update、推盤畀客,而你偏偏反其道而行?」

「我過往嘅經驗話我知,要闖出自己一片天,必須同大部份sales行唔同嘅路。」Pat散發睿智的眼神娓娓道來。佢又補充,主力搵不放售嘅舖位去cold call爭取獨家盤,最大原因係現時市場放賣嘅舖,理論上已經有1,000個經紀推緊都賣唔出,證明市場未接受到呢啲舖位嘅放盤價(全港專做舖位嘅代理約1,000人)。等於鍾情炒股票嘅股民,大部份都係一窩蜂人買佢又買,但永遠只得少數人贏錢。同樣地好多有經驗嘅舖位代理行業知識甚豐富,但缺乏市場智慧。就係本着呢個信念,普通人會去爭紅海市場,佢自己去開創藍海,一天到晚都係打畀啲唔放售嘅業主傾偈,懇求畀個「試做價」,希望有新盤源做。

Pat第2天發現有個位置相當靚嘅灣仔道地舖,業主長期都唔放售,同業主王太傾過電話,但王太回應亦非常冷淡。熟悉呢條街嘅同事話呢個業主脾氣比較大,但係Pat覺得反而係機會,每日如常不厭其煩打電話同王太聊天,後來業主王太開始接受佢,但每一次都表示唔會放售,Pat亦鍥而不捨噓寒問暖,終於約到業主飲茶,見面時大家傾談甚歡,期間Pat覺得王太非常面熟,「王太,我覺得你好靚女,保養得好好呀,另外想問下你是否曾經持有過駱克大廈住宅?」Pat笑笑口試探下佢。「哈,你點解會知我個名叫李靚檑㗎,不過通常啲人都叫我王太。何解你又知我曾經住駱克大廈嘅?」王太驚奇問。原來佢就係1年前賣駱克大廈的住宅單位畀阿Pat作自住時,簽約見過一面,竟然係新舊業主重逢!大家驚覺甚為有緣,最終打開缺口畀灣仔道舖佢獨家放售。

Pat二話不說即時搵晒城中舖位投資者出嚟睇舖,結果收咗兩張支票傾價,其中A先生出價好接近,經過三天來回議價下,王太終於都接受咗價錢肯賣,但A先生突然覺得好似出價太進取,想收回支票唔買,結果Pat與王太周旋再降低價錢,最終成功促成單Deal。

最奇妙嘅事就係簽成呢個舖位後約一個月,仍未簽樓契成交時,此舖位之地段受某大發展商收購,我哋接到offer代表發展商向新買家A提價接摸貨,但竟然到A先生又唔想賣,覺得既然發展商收購,不如等佢申請強拍之時先去傾,應該會賣高啲。Pat唯有繼續動之以情,再加以利誘,用甚麼短時間購入、付出成本小小但賺價相對多、等到強拍就可能要幾年後、即時可套現再搵投資機會等等勸說,但A先生始終不為所動。

如是者兩星期後,A先生因為身體略有不適入院檢查,Pat知道後第一時間衝到醫院繼續「磨爛蓆」,A先生嘆服佢嘅堅持,為咗免除「噪音」煩惱,結果大筆一揮賺幾百萬元離場,我哋簽成生意,發展商亦如願地收購成功,達至三贏效果。呢單串燒買賣連贏位,賺咗大約160萬佣金,正正係時來運到+堅持嘅經典「串燒連」。預祝Pat Yip繼續「腦活神通,事業成功」,成為舖位界嘅神話!

鄭得明  利嘉閣地產商舖部高級營業董事

密切留意BossMind動向!立即CLS

FB    Instagram    Youtube

#
Social media & sharing icons powered by UltimatelySocial
error

Enjoy this blog? Please spread the word :)