收市閒情|EY搞分拆有古怪|千頌C

|

1:正所謂阿婆走得快,一定有古怪。EY Global管理層最近決定批准將核數、諮詢業務分家,然後再將諮詢業務IPO。EY環球業務今年6月止全年業績創晒新高,睇breakdown,consulting business貢獻139億美金收入,按年增長講緊係25%,係公司增長最快嘅一瓣業務。那邊廂,審計業務收入今年都升到144億美金。審計、諮詢兩兄弟拍住上,收入做到break record,忽然無啦啦要分家,係為乜先?

2:EY想分拆,官方原因係點?方便大家睇,我用第一身意譯去寫:「咁係為公司長遠發展好架!依家我哋好多生意唔做得,Amazon係我哋audit嘅、Google又係我哋嘅、Salesforce都係,大家都知監管要求啦,佢哋係audit客,我哋就唔可以同佢哋合作做consulting生意架啦,分拆好呀,生意好呀。」

EY分拆變相自削競爭力

3:不過諗真啲,成壇嘢個時機、動機都好古怪。公司今年收入創新高,本來證明依家嘅多元策略係work啦。不過如果真係分拆咁會點呢?安永就只係剩返audit業務,正如頭先所講,呢門生意本來已經近乎見頂;仲要拎走埋公司嘅增長引擎consulting,令呢間公司嘅前景,已冇幻想空間。然後同Big 4另外三間比,得EY冇提供consultant業務,變相自削競爭力。

4:咁對分拆出嚟嘅新公司又點呢?冇錯係可以自立門戶,冇晒來自audit監管嘅包袱,客路理論上係闊咗。問題係,要透過分家去做一啲以前做唔到嘅生意,首先,你要分家得好撤底,至可以滿足監管要求。如何分家得撤底?改名、rebrand是基本,要完全成為一間獨立嘅consultant公司。咁意味住,沒有Big 4背景支持,佢要憑自身實力,同市面顧問巨頭,好似Accenture、Bain & Co正面交鋒。

EY分家 屬早著先機定係後知後覺?

5:講起Accenture,原本係叫Andersen Consulting,呢間公司正正係由曾經嘅會計Big 5,但已經執笠嘅安達信分拆。當年2000年正式改名時,佢哋洗咗1.75億美金去做rebrand。廿年過去,公司2021年全年收入,達到505億美元,比EY非審計業務收入高近倍。EY依家嚟攪分家,到底真係早著先機,定係後知後覺、錯失良機?

6:本來競爭已經激烈,依家冇咗big 4 firm嘅光環,競爭力少咗一截,仲未計以後冇咗由audit business轉介嘅客戶;同時,公司亦要洗大舊錢兼花時間去改名兼做rebrand,重新build個image同reputation,你估易?

好啦,你話佢哋有客底,根基穩!OK!經濟好咪冇問題囉,問題係依家環球經濟差:通脹、加息、衰退,連客都未必想使錢,留唔留得住都唔知,更何況搵新客?要搞分拆,正路諗都唔會揀個咁高風險嘅時間,去做呢個20年幾來最大嘅重組呀化?好趕時間咩?到底係邊位咁趕呀?

7:好啦,又如果分拆真係有so,咁點解Big 4其餘三間,都講明唔會考慮分拆呢?唔通真係只係EY先有咁獨到嘅遠見?定係由頭到尾係國王的新衣?

8:對Audit發展睇唔到著數咗去邊,呢個時候將consulting自立門戶又唔make sense,咁成壇嘢邊個一定有利?諗來諗去,就係班partner!分拆喎,緊係有錢分!

外媒報道,分拆後審計業務合伙人,以英美普通合伙人為例,每人可以收2至4倍嘅年薪作為分手費,相當200萬美金以上,至於高級合伙人就更多。諮詢業務合伙人,就會拎得新公司股份,預計估值高達其年薪7至9倍,分5年支付。至於牽頭促成分拆方案嘅安永全球主席兼行政總裁Carmine Di Sibio ,更有望獲取數以千萬美元計獎金。

9:歷史好容易重覆,2000年安永為滿足監管要求,以 110億美元,將 Ernst & Young Consulting 賣俾巴黎嘅 Capgemini。結果由於兩間公司文化撈唔埋,加上科網爆破、經濟下行,兩年後要大裁員。至於當時獲股份嘅partner,到禁售期結束之時,股價已蒸發咗八成。同時,到2006年不競爭條款到期,安永即刻開返consultant business,即係依家即將要分拆嘅呢瓣業務。

10:講開又講,自從上個月EY Global公布去馬搞分拆、安永大中華區已經率先表明唔參與,今日又有另外一個地方公開話唔玩。根據傳媒報導,安永以色列拒絕左EY Global嘅分拆計劃,成為中國業務板塊以外另一個拒絕再玩嘅區域。相信仲會有其他地方跟隨其後。

11:安永Global班Partner會唔會重蹈覆轍,要大家拭目以待。不過諷刺嘅係,估唔到十幾年前,公司兜轉開返consulting;十幾年後今日,有一班人上咗岸的senior partner,為咗自身利益趕收割,淘空公司前景,不理後生仔未來,將公司十幾年嘅心血套現。最近有報道就話,Big 4另外三間趁安永搞重組,已經開始撬客同挖角,名乎其實乘虛而入,如果你係EY auditor,面對一班咁嘅「前輩」,你會點諗?

 

 by千頌C

http://bit.ly/ChincongC

密切留意BossMind動向!立即CLS

FB    Instagram    Youtube

#
Social media & sharing icons powered by UltimatelySocial
error

Enjoy this blog? Please spread the word :)