收市閒情|證券行狂改名 年半第三次 抽「元宇宙」水叫「元宇證券」|千頌C

|

自從Facebook改名「元宇宙」之後,「元宇宙」呢三粒字真係周圍都係,周圍都係,但仲未同我哋有好大關係。不過,唔少公司都已經開始抽「元宇宙」水,sor,應該係話把握「元宇宙」龐大機遇。

講上市公司嘅,披露易呢輪耐唔時,都會見到呢個terms出現,創仔羅馬集團(8072)早前已公佈改名做「羅馬( 元宇宙 )集團」,帝國科技(776)早兩日又出通告,話要進軍元宇宙市場。

最近又有一間公司,又要抽元宇宙條水,有間證券行,啱啱又改名,叫「元宇證券有限公司」,英文叫「Metaverse Securities Limited」。留意返,我用個「又」字,係因為今次改名,係呢間公司自上年10月以來第三次。

2020年10月,由原來「玖富證券」改名做「富元證券」。原因來講,唔係上市公司,所以就冇公佈嘅。不過2020年底,內地多間P2P網貸平台因非法集資爆煲,當時經營網上理財產品嘅母公司玖富集團,都陷爆煲危機。後來公安介入後,玖富提出還款方案,最後同年結束互聯網信貸中介業務。

2021年07月,公司再改名至「以太證券」,公司去到今年就話要轉型啦,轉型做咩呢?睇個名就知,當然係炒得最勁嘅crypto業務,公司矢志成為一個證券和數碳資產投資交易全球平台。要大搞加密幣,改名做「以太」,都make sense 嘅。但唔make sense 嘅係,事隔未到半年,公司又改名做「元宇證券」,食Metaverse條水。使唔使改咁多次呀?噚日興以太幣就改一次,今日興元宇宙又改一次,喂,依家Marvels講緊「多元宇宙」,係咪過兩個月又改多次名?搞笑。

題外話,話說有幾年都有一個「改名轉運」嘅炒法,if間公司係上市公司,一話改名,好多時都可以炒到一日,但近幾年,啲中細價股都冇咩鑊氣,條橋已經唔太work 了。

by千頌C
FB專頁

密切留意BossMind動向!立即CLS

FB    Instagram    Youtube

#
Social media & sharing icons powered by UltimatelySocial
error

Enjoy this blog? Please spread the word :)