有啲團體見到乜嘢發展都反對，有時候堆砌出嚟嘅理由真係強差人意，好似最近就住明日大嶼嘅諮詢，有團體就話幾十年嚟有七成嘅填海計劃都會爛尾，所以反對成個交椅洲填海計劃。但係呢個所謂嘅研究真係做咗一個完美示範，乜嘢係邏輯推理上嘅錯誤類比。
做個研究嚟評論啲咁重要嘅公共事務，邏輯結構當然要嚴謹啦！類比論證，最緊要嘅就係用嚟比較嘅嘢，要有嚴密嘅相干性，而且相似點要多，不相似點要少。呢個研究話統計咗成半個世紀嘅填海計劃，都唔好講係咪真係準確，個個地方嘅歷史背景都唔同，經濟環境同當地嘅社會發展差天共地，喺咁多唔同嘅時空拉埋一齊來講完全都九唔搭八，好似印尼仲咁多橡樹，仲使乜嘢要填海啊，個研究竟然用印尼做例子。咁不如話隋煬帝開運河搞到隋朝滅亡，所以全世界都唔好再開運河啦！
好多時爛尾嘅嘢係啲政府政權改來改去，南韓幾年就換一次總統政黨，要發展啲幾十年嘅大計劃梗係容易出事啦！如果真係要做類比論證，既要係國際大都會，又要面積細小，加上係沿海嘅城市，真係較為符合類比相似點嘅只有新加坡。而新加坡當地40年不斷發展，填海嘅總面積超過14,000公頃，咁人哋個GDP咪不斷升囉，個貨櫃碼頭搬咗幾次啦。而家交椅洲人工島嗰個方案連1,000公頃都未必有，真係蚊髀同牛髀。
如果有啲團體真係乜嘢發展都反對咪講清楚囉，唔好用啲錯誤類比，教壞細路點樣做推理。另一個發展才是硬道理嘅證明就係深圳，40年前深圳真係一窮二白， 30年前仲要香港人去幫吓手發展， 20年前已經識行識走， 10年前真係唔使靠香港人。剛剛通返關去深圳走一轉，你就會睇到冇咗三年香港嘅人嚟，除咗個羅湖商業城冷清啲，基本上完全冇影響發展。
去到深圳客戶帶我去一間叫牛扒家嘅西餐廳食飯，人均要1,000人民幣一位，坐滿場仲要主要係本地人。開餐竟然有威靈頓牛扒食，雖然個酥皮未做到最鬆軟，但係個他他牛頭盤都做得好出色有味，沙律同湯完全係做到香港高級餐廳嘅水平。有發展，人民嘅生活就自然會好。
曹參國
註：專欄作家言論不代表本網立場
