每年年初都會有好多專家走出嚟預測成年嘅樓市走向，遠嘅唔好講，淨係舊年香港樓價跌咗一成半，喺年初又有幾多個專家可以清清楚楚預計到。所以要考慮入唔入市，都真係要靠自己嘅觀察同判斷，其中政府賣地嘅表現係最高透明度嘅地產寒暑表。而最近呢幾日赤柱同觀塘地嘅投標反應，可以話香港呢年嘅樓市都唔會好過。
點解投地嘅表現可以預測樓價發展？因為香港政府嘅公共財政一直都好靠賣地收入，回歸之前香港政府發展荃灣同觀塘呢啲衛星城市，都慳住慳住逐塊地賣出嚟，等到政府每年都有穩定嘅收入。所以政府掌控幾時賣地，幾時喺邊個區買邊塊地，全部都要有精準計算，如果唔係就連十幾萬公務員都出唔到糧。
但係面對環球經濟衰退，美國聯儲局為咗解決自己嘅通脹，係咁加息，俄羅斯同烏克蘭連傾偈嘅機會都未有，呢啲咁宏觀嘅因素就算香港公務員幾咁精準都控制唔到。所以最近推出嚟嘅政府地同市建局土地，唔係流標就係得一份標書，個市況係慘到冇得再慘。呢個係反映咗發展商有生意都唔做，而香港嘅發展商同內地好唔同，財政實力豐厚，都唔係咁多要靠借貸，但係有錢喺度都唔投地，即係話個市會拾級而下。
好似尋日赤柱豪宅地，明明就喺海邊步行範圍，行過去就係古蹟美利樓，發展嘅面積又可以有自己嘅私人圍牆，成個南區都好少搵到咁嘅發展項目。但係竟然得四間大型發展商落標，最後都係流標收場。
今日市區重建局喺觀塘市中心第四同第五期嘅裕民坊發展項目地王，截至投標嘅時候竟然得1份標書，仲要係地產大哥新地（016），其他大小發展商全部都冇落，舊年9月市建局收到成24份意向書，去到11月個市最差嘅時候都邀請咗19間財團競投，即係話佢哋全部都縮沙。
但係呢塊地可以話係九龍東呢個第二個市中心嘅唯一地王，同港鐵站係零距離，成個九龍東都冇乜高級酒店，呢塊地係好罕有可以發展高端零售同埋酒店、寫字樓。全行都咁看淡，咁靚嘅地都唔落標，仲唔係今年樓市前景堪憂嘅實實在在證明？
樓市今年冇運行，都係實實在在食返餐好嘅先。通咗關都唔係咁易上內地食好嘢，喺香港就去咗尖沙咀朗廷酒店嘅唐閣，點知撞到廠商會會長史立德博士，通咗關廠家當然就好高興啦，佢就大聲讚好呢間米芝蓮餐廳嘅魚翅同埋蟹蓋。
我都聽咗佢推介，尤其蟹蓋好少做到蟹肉仲有新鮮味，加埋一啲忌廉嘅柔軟口感，真係食過返尋味。曹老闆見客都想坐得舒舒服服有包房，呢度就滿足到要求，而且放滿晒中西方藝術品同埋裝飾，老外客人就更加喜歡呢種東方氣息。
曹參國
註：專欄作家言論不代表本網立場