地產界大佬早排又請我曹老闆食私房菜，去香港仔一間叫做尚讌嘅隱蔽地方，夠晒有私隱。我哋講開地產股點樣分析，其實同嘆私房菜嘅原理都好相似。
用上星期啱啱公佈業績嘅新世界（017）做例子，佢哋講到明唔會供股或者有配股計劃，即係股價係幾多就明碼實價，唔會無端端同股東抽水。就好似幾貴嘅私房菜都好，好似呢間講明幾千蚊一位係冇所謂，最緊要唔好埋單先搞到大家唔開心。
跟住就梗係要睇個時勢係點樣，香港啱啱先同內地通關，大把遊客嚟香港消費，呢啲咪大環境嘅利好消息，新世界啲高端商場本來就係想吸呢一班客人，而家終於時來運到。好似今次嘆嘅呢間私房菜裝修冇得頂，一晚只招呼一台客，服務周到，啱晒而家取消防疫限制，可以請老友聚會。前菜係黑松露雪糕、自家制，啱晒氣候食到好驚喜。
仲要就係睇吓隻地產股有冇亮點，新世界嘅K11商場品牌，搞到一個好高端嘅藝術形象，唔係普通嘅消費客群，全部設計裝修管理都係心機錢。喺疫情底下竟然可以累積有2,200幾萬個會員，淨係今年K11 MUSEA去到2月初，銷售額就已經係舊年嘅兩倍，當中內地客人佔咗四成，咁仲唔係食住條水上。好似呢間私房菜嘅亮點就係食材出眾，全部都係即日新鮮採購，主菜嘅牛面頰真係唔容易買到咁大舊，啖啖肉又入口鬆軟有牛味，通關貨運復常，想買咩新鮮嘢都易咗好多。
地產嘅投資期比較長，分析地產股，當然就要睇吓佢有冇及早準備。好似新世界旗下嘅啟德體育園、機場航天城全部都係呢幾年落成，就快進入收成期。就算係內地嘅項目都跑贏晒大市，內地物業項目舊年下半年都有92億人民幣收入。仲有香港已出售但未入賬既物業收益，有185億港元，會喺今年下半財年入賬，另外亦有近43億港元，會係2024財年入賬。呢啲數全部入埋帳，都令人睇好股價。
就好似呢餐私房菜食到大家舔舔脷，魚子醬混合牛油果，口感一流，甜品係蛋白混合士多啤梨夠晒新穎，仲要成晚嘅餸菜都係小糖少甜少油，有咁嘅心思去準備一餐飯，就好似地產股有咁嘅細心去管理成個企業，自然會客似雲來啊！
曹參國
註：專欄作家言論不代表本網立場
