特首李家超喺北京返嚟話香港要融入國家發展大局，但有時北京嘅主意都唔容易解讀，如果啲官員過度解讀有可能就會適得其反。如果真係有心了解國家發展，中國對世界嘅大門一早打開，舉辦北京奧運會、上海博覽會到冬天奧運會，呢啲國際級盛事係咪香港都可以爭取舉辦呢？就算唔係咁頂級嘅活動，國際嘅體育活動，好似高爾夫球國際賽，本來好好地喺香港舉行，點解就要拆咗個粉嶺高爾夫球場搞到冇得辦呢？
施政報告為承諾咗有3,000幾公頃土地未來可以開發起樓，但粉嶺高爾夫球場其中只不過9公頃嘅地就係都要下年收返。上星期高爾夫球亞洲巡迴賽和歐洲巡迴賽嘅負責人就開聲，如果特區政府真係收返粉嶺高爾夫球場土地，佢哋將唔會再嚟香港舉辦國際巡迴賽，希望特區懸崖勒馬，唔好自己「去國際化」。
歐洲巡迴賽首席賽事業務官Ben Cowen就講到明，粉嶺高球場收地起公屋，將會對專業球手帶來負面影響，國際賽事亦都唔能夠再嚟香港舉行。國家領導人當然想香港解決到房屋問題，基層唔好住得咁差，人民生活開心啲。但係特區政府要起公屋，其實真係唔需要拆咗已經運作緊嘅高爾夫球場。呢一面還要搶人才搶企業，又點可以另一手去拆咗可以吸引高端人才同企業嘅高爾夫球場呢？
香港成日話要打贏新加坡，新加坡有10幾個高爾夫球場成1,500公頃，香港嘅優勢係四季分明，所以國際賽事一般都係3月同11月最好天氣嘅時候喺香港舉行，呢啲優勢點解我哋唔識得善用呢？我曹老闆請教過行政會議成員打高爾夫球嘅樂趣，因為高球可以用讓分嚟玩比賽，即係新手同埋老手都可以樂在其中，其實粉嶺高爾夫球場已經開放好多時間畀公眾使用，繼續續約咪要求佢哋再開多啲時間囉。
增加公屋，只不過係香港內部嘅城市問題，但係保住香港國際化就係配合國家發展大局嘅重要一步，邊樣重要啲？點解特區政府嘅官員點極都唔明。喺1886年已經有全球城市呢個概念，當然當時只係講緊歐洲城市，到咗今日國際大都會嘅定義都必然會包括體育硬件和舉辦國際賽事嘅能力。
再簡單啲講，香港酒店嘅自助餐就係最好反映國際化嘅表現，香港人聖誕節都好鍾意去酒店食自助餐，我曹老闆咁講，全世界都冇乜邊個城市好似香港嘅自助餐咁多元化又高質素。
剛剛喺疫情開始嘅時候裝修完嘅九龍海逸君綽酒店，仙遊咗嘅江澤民當年嚟香港咪就係住呢間酒店。酒店保住佢哋一線海景嘅招牌自助餐，有中式點心，有東南亞炸魚，又有日本刺身、串燒同天婦羅，雖然甜品唔算係佢哋招牌菜，呢種環球美食嘅體驗，咪就係香港國際化嘅表表者，點估你都唔會支持封咗自助餐，改成為兩餸飯派飯中心。保住香港嘅自助餐同高爾夫球場，香港先繼續有運行。
曹參國
註：專欄作家言論不代表本網立場
