籌辦八年的中環熱氣球未能載人升空，最出位的當然是苦主何小姐，她能夠在完全沒有使用粗口的情況下破口大罵，確係出色，但我認為政府事後交出官方劇本，更值得學習，讓大家了解如何做Bridging，四両撥千斤。
劇本第一幕，就係為事件定性。官方指控集中早喺兩星期前的8月20號，主辦方嘅實地測試已「效果未如理想」，用詞極其嚴厲，直指現場「難以穩定控制」，結論係「安全風險顯著」 。呢一招，就係為整件事定下「原罪」，好比一張黃牌，警告你已經喺死亡名單之上。
但其實，到咗活動前一日，主辦方搞咗另一次測試，新聞上就沒有交代很多細節。可以想像，如果這次測試也是很糟糕，肯定也會被重點放大，但論述反而很有趣，政府嘅致命一擊係：「考慮到未夠時間再次進行載客測試」 。所以，最終批准只係一場幻術——准你升空，但唔准載人。
用一句人話嚟總結呢個高章劇本就係：「我哋一早就話你有問題，係你搞唔掂；到你話搞掂，Sorry，冇時間慢慢睇你表演了，為咗公眾安全，我哋只能夠Say No。」喺官僚嘅時間表裡，一切已經太遲。
所謂嘅「繫留熱氣球」（tethered hot air balloon），喺全球各大旅遊熱點，由英國Bristol到美國Albuquerque，甚至日本群馬同大陸桂林，都係常見嘅活動。就算是內地，亦試過喺多個城市舉辦大型熱氣球嘉年華，惠州、三亞等城市都有承辦過類似活動，亦係設有原地升空體驗（10至30米）。2021年新華社寫過一篇文章，寫到”載客熱氣球，浪漫要與安全齊飛”，並提到遊客在選擇熱氣球項目時，不要單從價格角度做選擇，要綜合考慮公司的資質和管理水平、熱氣球飛行員的資質、熱氣球的狀況等因素，選擇比較成熟的公司和項目。
然而，主辦方真係咁不濟？佢哋為咗打呢場仗，都搵咗唔少人去endorse：有執導過全球最大布里斯托熱氣球節嘅Ian Martin、入選「熱氣球名人堂」嘅傳奇大師Paolo Bonanno、仲有安全紀錄屈機嘅英國首席飛行教練官Andy Austin。但第二次實際測試結果係點？政府和主辦方有機會可以披露更多？
或許，喺政府眼中，你8月20號嗰次試水，已經係先入為主。就算你之後請到舒麥加嚟揸，佢哋心目中嘅負面印象早已定型。你嘅世界級專業，喺佢哋嘅「程序正義」面前，一文不值；也或許，第二次測試，主辦方的表現也是同樣不濟，只是政府厚道，沒有落井下石，才提及活動前一天的測試再次失當。故事是真是假，只有政府同主辦方先知道。
所以，真正嘅水魚係邊個？表面上當然係買咗個空心希望嘅市民 ，亦係「盛事（亞洲）香港」，唯一嘅贏家，可能就係嗰班成功「防範風險」、確保自己唔會孭鑊嘅官僚。
流動美食車，不能流動；熱氣球節，不能升空。香港到底是發生咩事？在商言商，任何deal都可以傾到最後一分鐘。呢次事件，正正迫使香港人去問一個根本問題：究竟我哋想要嘅，係一個識得計數、識得「執生」嘅盛事之都，定係一個唔做唔錯的程序之都？
中環十一少
註：專欄作家言論不代表本網立場
