執筆之時波叔仍未公佈2025-26財年的財政預算案，但香港由2019-20財年開始計，到2023-24財年，5個財年，4年財赤，實際財赤加埋5300幾億，再加上波叔又打定開口牌，2024-25財年財赤又1000億，即係幾可肯定係6年5赤格局。財政儲備亦由2019-20嘅1.16萬億，跌到2023-24財年7300幾億。按照《基本法》第一百零七條——「香港特別行政區的財政預算以量入為出為原則，力求收支平衡，避免赤字，並與本地生産總值的增長率相適應。」某程度上香港財政已經同《基本法》有抵觸。嗱，無話違反，只係已經同第一百零七條原意有啲矛盾。
當然香港財政儲備仍然有唔少，但如果無改善繼續財赤，一旦破產點搞?
首先，有啲人一定會大安旨意大陸會泵水救亡，但大陸會唔會救呢？從佢角度，主要有兩個考慮點，一係佢有無能力救，二係值唔值得救。現時大陸官方經濟數字雖然都叫OK，2024年有5%增長，但民間有無相同感覺就唔多肯定。加上之前一直有講大陸都積極化債，但過程都無乜動用中央儲備去做嘢，而且以現時大陸情況，中央財政可以話係最後緩衝區，喺2024年12月負債率約70%。可以話有能力，但唔係太多餘力。所以就要考慮值唔值得去救，香港本身最重要就係扮演國際金融中心角色，即係既對外國，又對大陸。但現時美國都已經將香港列為敵對勢力，對大陸又經歷過2019，唔好期望大陸會將香港重要性加重。如果唔係咁值得去救，就要諗一個好理由去拒絕，呢個時候《基本法》就會發揮作用，因為根據第一百零六條——「香港特別行政區保持財政獨立」，可以大條道理避免踩呢個深潭。
如果大陸唔救，香港就要撲水，當然得閒做下啲借新還舊，或者債務重組理論上可以延長壽命。但，呢個係建基於香港仍然拎到最好嗰類信貸評級，評級機構見你財赤嚴重又無乜解決方法，降評級好正常，一降評級就會影響融資成本，條數就會完全唔同計法。如果到咗要放賣資產地步，譬如要減持港鐵股份畀外資，如果外資拎到一定股權，肯定要對營運有話語權。雖然香港人經常埋怨港鐵經常加價，但平心而論比西方好多國家鐵路收費仍算低，如果淪落到類似情況，外資股東都幾肯定要增加收費確保自己回報，香港人生活開支隨時大幅提高。
避免呢個情況，當然又係講開源節流。但開源邊有咁易，香港最吸引地方就係稅制簡單，稅率較低，所以講咗咁多年要拓闊稅基，好境時唔做，逆境時更加唔敢亂做，而家只能好似大陸地方政府咁，靠非財政收入盡量頂，即係加強各樣罰款。但頂得一時頂唔到一世，始終常規財政收入先係大數。2022-23年度整體稅收約3602億港元，較上財年3785億港元，減少約5%，主因係印花稅減少。至於2023-24課稅年度整體稅收為3420億元，又按年減少5%，主要因印花稅及利得稅減少。短短兩年，印花稅同利得稅帶頭令稅收少咗365億，政府想加稅嗎？肯定想加，但更擔心加完隨時趕走更多資金得不償失。
咁就只剩返節流一項可以揀，而家市場上主要分兩派，政府就吹風減低長者2蚊乘車優惠，出面就希望公務員減人工。論重要性，乘車優惠一年先用40-60億左右，2023-24年公務員人工開支就1562億，即係就算完全取消乘車優惠，筆錢都唔及公務員減薪5%。當然，要公務員阿頭申請整體公務員減薪係有難度，一方面話會影響士氣，另一方面自己都要減人工，係難受啲。但大陸都有係咁吹風上面公務員要減薪，重要講緊減兩至三成，相信都大機會減，只係最後可能減一成半成。現屆香港政府官員咁鍾意乜都跟大陸，估計都會做下樣照跟，因為唔跟，到時國家級輿論就會出現，講點解香港財赤嚴重，都仍然不顧民情，肥上瘦下，咁對特區官員仕途唔知有幾大影響。既然從結果論都係一樣的話，當中操作空間，就係點做得好好睇睇。
假設大陸公務員減薪，到時香港政府先照跟，只會落得一個「只識跟風」評價。但如果而家政府中高層，可以先按職級減薪，譬如Point 15至24嘅公務員先減1%，Point 25至34嘅公務員減3%，Point 35或以上減5%。老實講，可以慳定嘅錢唔係好多，但至少係一個率先表態，而且平衡唔同薪酬嘅公務員承承受能力。如果之後大陸確定全部公務員減薪10%，撇開掂到最低工資嗰批，到時再全部跟減10%。咁樣低層公務員要有怨言，都無乜好講。
而且，如果公務員覺得自己士氣有影響，可以直接好行唔送，順便減少冗員。大家都知公務員工作能力，佢哋亦自知有幾多斤兩，呢個時勢點敢劈炮，所以佢哋怨同唔怨，分別未必咁大。但政府高層主動咁做，可以話贏輿情，大陸而家啲官對輿情非常重視，對仕途有深遠影響，現屆政府財赤成為定局，但行政長官可以考慮，揀向老人家開刀，定揀公務員開刀。揀向老人家開刀，又慳唔到幾多錢，輿論就會講不敬老，而且大陸老人家搭地鐵都唔使錢；如果向公務員開刀，至少日後退任份履歷都可以有德政寫下。
可能眼前有一啲既得利益者會畀官員壓力，但眼前利益同日後自身利益比較，要計好自己條數。
金缸經
註：專欄作家言論不代表本網立場
