特朗普上場後，中美關係走向又成為上至國家領導人，下至維園阿伯嘅話題。而且美國雖然減息，香港又好令人意外咁跟足減息，為救樓市都可以話係扭盡六壬。更甚者，開始有人講聯繫匯率成為咗香港負累，再加埋特朗普上台，又有好多人講聯繫匯率會唔會主動或被動取消。
先講被動，即係坊間成日有人講美國出手取消呢個制度。簡單講，聯繫匯率真係香港「內政」，真係無國家可以出手干預制度運作與否，所以呢個連偽命題都唔算。又有人講，美國會唔會直接將香港踢出SWIFT支付系統，首先美國係有能力咁做，但唔好忽略佢公關能力，睇返佢制裁俄羅斯，都係等俄羅斯出手打烏克蘭後先郁手，絕對唔會出師無名。所以如果類比返，除非大陸郁台灣，但就算真係發生，美國都會制裁大陸銀行先。
觀乎而家情況，最有意欲主觀開戰嘅大陸，喺特朗普上場後拎出嚟嘅經濟政策係化債，呢個係長期且痛苦，但可以話係面對現實嘅發展方向，而非強行用更多財政同貨幣政策谷短期經濟，化債得唔得未知，但至少判斷大陸短期內無意欲挑起戰火。只要大陸無主動攻擊台灣，美國出師無名，亦唔會貿然踢中國出SWIFT。而且，就算俄羅斯被制裁，都只係講緊部分俄羅斯銀行被踢出SWIFT，名單都無俄羅斯央行。如果直接類比，只要香港金管局無被制裁，理論上唔會直接令聯繫匯率玩完。
至於聯繫匯率成為香港負累，更係無稽之談。如果香港無咗聯繫匯率，港元有咩地位？無咗同美金掛鈎，想要港元穩定，基本上得返同人民幣掛鈎一個選擇，如果係咁不如直接用人民幣。當然礙於基本法，港元就算去到實亡地步，仍然會名存。但如果港元掛人民幣，即係美金代用券功能消失，又係嗰句，香港直接變中國普通城市，所有同價錢有關嘅嘢，即時毋須有premium，點解香港樓可以比大陸樓貴咁多，唔通真係獅子山下體現香港精神咩，就係因為香港重做到啲甚至連北上廣深都做唔到嘅嘢，呢啲特殊功能就係資產溢價體現出嚟。如果為咗所謂因為美國息率影響香港經濟同樓市復蘇，而放棄聯繫匯率，咁香港樓價可以即時同深圳收窄絕大部份溢價，到時就算香港經濟好轉，大陸人寧願去上海同北京買樓拎個戶籍，嚟香港買樓做乜？既然香港再無獨特之處，外國人要投資大陸，首選都會係上海北京。
覺得聯繫匯率成為香港負累，出自外資股票策略主管之口，係一位外國人。講真無得怪佢，從金融角度，香港確實要更低利率去刺激借貸投資同消費。但外國人未必明白，聯繫匯率呢刻對香港意義有幾深，意義之深，係現屆香港政府夠膽叫美國唔好說三道四，但一講到同美金脫鈎係絕對無得傾。
金缸經
註：專欄作家言論不代表本網立場
