上周末特朗普遭遇行刺，好彩佢吉人天相避過一劫，否則而家全球隨時亂到七彩。政治污糟到不堪，凶手動機之類嗰啲到時份報告睇下就好，不過網上睇返事發前兩三分鐘啲片，就知道特朗普就算做咗美國總統，都未必咁平安。
不過無論特朗普定拜登勝選，相信都無阻減息。首先聯儲局主席鮑威爾講明，唔會待通脹回落至百分之2目標先減息，由於而家拜登同鮑威爾任期重疊，所以如果拜登勝選，聯儲局一如計畫減息機會好大。至於如果特朗普做總統，就隨時減得更快，除咗近日佢受訪時話，一旦當選會畀鮑威爾完成直至2026年5月任期，大家亦唔好忘記，佢第一次做總統時，鬧鮑威爾加息，又鬧佢減息太慢，所以邊個做總統，美國如無意外都會減息。
美國減息，香港係咪買得樓？老土講一句，你都要衡量返嚟緊有咩風險，至少短期經濟不景，保唔保得無份工，會唔會減人工，要唔要退獎金嗰啲，真係要考慮好自己風險承受能力。同埋就算美國減息，香港一來未必跟減，二來未必減足，呢個亦係要計好數。不過至少暫時未見到會加息高過而家水平，即係供樓成本應該唔會大幅增加，大家計到數。所以最近有啟德新盤開賣，反應相當唔錯，至少好過今年大部份新盤。
新盤銷情好咗啲，寫字樓似乎仍要努力，由疫情開始，好多外資已經撤離香港，好多外資大行裁員，連阿里王子家族辦公室都話唔嚟香港開辦事處，可見香港對外資吸引力真係弱咗。所以市傳一啲香港地產商，報道話長實都畀多啲佣個代理，幫手搵寫字樓租戶。強如長實都要出盡辦法招租，唔納空租，而且聽講住宅市場都有類似高佣情況，呢啲時勢，大商家都話畀大家知，市道唔好，就算減息，都係現金為王。
金缸經
註：專欄作家言論不代表本網立場
