上星期，彭博出篇報導，話有消息指特朗普喺首個總統任期已經想終止香港聯繫匯率。首先呢啲「外媒+消息」套路，已經試太多次，十居其九都係流料；其次，俄羅斯真係要開烏克蘭波，美國先至開始制裁佢，當時美國只係同大陸打貿易戰，絕對毋須升級到呢個地步，而且事隔幾年，先至講呢單嘢，如果有心攞籌碼打貿易戰，當時就應該放風。因此可以判斷呢個係美國嗰邊，當時無真正相關意圖，而家喺特朗普準備上任前，借媒體出口術向香港政府同大陸嚟個下馬威先。
之前有講過，唔太信美國會主動阻止港元繼續同美元掛鈎，到呢刻仍然保持呢個睇法，因為而家大陸好明顯同其他國家玩緊去美元化，而美國根本目的就係阻止呢件事發生，佢要美元繼續主導全球支付地位，咁先可以對其他國家繼續保持影響力。如果美國呢刻主動幫你去美元化，除非佢好有信心食硬你，否則呢個決定並非明智。站在香港角度，無咗美元掛鈎，港元貶值，香港自此無哂優勢，名存實亡。大陸則無咗個枱面嘅國際化資金池，不過睇返俄羅斯，制裁咗差不多3年，一樣未死得，但大陸會聯合更多國家喺枱底搞去美元化，呢個就睇大陸死先定係美元失去主導地位先，但就算大陸死先，一旦去美元化成咗形，對美國嚟講風險唔細。而且大陸經濟差，趁住美國減息先至有減息降準空間救經濟，但如果今年美國加返息，將中美息差再拉闊，留一個資金自由兌換嘅地方畀大陸人走資隨時更好。
但呢個判斷唔代表特朗普會放香港一馬，反而想講畀香港同大陸知，美國將會傾舉國之力，擊潰大陸經濟，香港無可避免亦會成為金融戰場。不過呢單報導出街後，香港政府無乜人出嚟反駁，都唔出奇，因為年底應該都忙緊述職同set KPI，邊有閒情逸致反駁。財政司司長波叔喺網址發表新年賀辭，講到恒指2024年升18%，但睇返波叔就任財政司時，恒指差不多23,000點。香港作為國際金融城市，大部份決策理應考慮金融表現，如果特區首長、三司十五局嘅司長同正副局長，加埋相關財金官員，將KPI同恒指表現掛鈎，作為薪俸同升遷考核條件，相信官員們會畀到一個更完善嘅香港發展方針畀普羅大眾睇，亦會更識得同唔同國家博奕同打交道。
金缸經
註：專欄作家言論不代表本網立場
