譚仔（2217）上市不似預期，至今股價仍然「潛水」，不過公司最近又有新搞作，就係同香港知專設計學院（HKDI）合作舉辦咗一個「譚仔姐姐2046未來制服設計比賽」，以迎接25周年。今日仲舉行了一場時裝騷，除咗有名模助陣外，更有不少譚仔姐姐現真身！
比賽入面的制服作品全部由HKDI學生設計，仲話將生菜融入設計，寓意未來與大自然融為一體，相當有創意。模特兒方面，除了邀請名模馬詩慧（Janet）助陣外，仲有Jessica C.、沈殷怡（Shirley）、劉沛蘅（Hillary），以及人氣十足的媚姨和多位真正的譚仔姐姐，親身上陣演繹學生作品行天橋。
Janet仲大讚今次拍攝過癮，佢話「雖然效果出來帶點搞笑，但製作十分認真，以前行騷當食生菜，今次真是一棵生菜放在身上，十分新鮮」。至於沈殷怡穿的是富有現代東方美學的新派旗袍，大騷美腿。Jessica C.出場時仲以美式口音譚仔話講「我係譚仔姐姐」，令全場爆笑。
至於活動尾段，仲有譚仔主席兼行政總裁劉達民登場，以一身間條西裝兼墨鏡出現時裝騷上。
