俄烏局勢仍然係邊傾邊打，缺乏實際好消息。三大指數期持續波動，無動力收復上周失地。科技股壓力更大，納期升過1％後回返晒，原因或者係歸究債息急升，10年期國債高見2.1厘。市場焦點就望去周三聯儲局議息聲明，等睇鮑威爾點拆除7.9%通脹威脅。
睇最近市場走勢就不太樂觀，高盛1個月內兩次調低標普500指數目標價，由4900點降至4700點，意味住2022年按年計負回報。GS睇貴價商品會影響需求以及經濟增長，構成標指盈利最大風險，每股盈利增長將由8%納至5%的$221。年初GS睇標指到5100點。
另一邊，油股仍然保持大漲小回格局，雖然紐約期油急回至104美元水平，OXY曾跌5%收收窄到3%。消息面受俄烏和談﹔印度幫俄油接貨﹔伊朗核協議前射飛彈去美軍基地等等影響左右。
中概股就無乜特別地繼續跌，反而值得睇係深圳、青島等地疫情反彈，對航運股有幾大影響。彭博講緊青島港口等埋岸航隻持續累積，周一大約有72隻航等緊，較2月尾升咗一倍，而運航持續延期會推升運費。
有明顯分別係美國LA港口擠塞已經大幅改善，由上年年尾超過130隻航等埋岸，減至最近70隻，所以航運股走勢變相就好視乎中國會唔會繼續堅持清零。
個股消息︰
蘋果受累供應商富士康因應疫情暫停中國工廠營業，AAPL跌1.6%
Lockheed Martin受惠德國有意買入F-35戰機，LMT升1.8%
