隨住俄羅斯承認烏克蘭東邊兩個自稱獨立的共和國，開始以維持和平名義派駐軍隊，引起美國及歐盟聲討及計畫進一步制裁。從股市角度就位位皆輸，油、金及債成為安全港。
美股指數期貨一度下試1月尾低位後，開市前收復部份失地，最差納期跌0.8%。
高盛量度風險資產對俄羅斯盧布敏感度計算，睇最差情況係當盧布跌10％，會推高油價13％，拉低10年期債息27點子。標指及納指將有可能分別跌6%及10％。
與此同時市場仍然等緊歐美制裁正式公佈，避險情緒有所升溫，資金泊入國債，拉低10年債息跌至1.94厘。高盛話如果衝突有降溫跡象，盧布回穩，將會迎來6%反彈，即係兩邊機會五十五十左右。
另外，傳統避險工具黃金挑戰一年高位見1897美元﹔油價喺制裁前升見先，紐油上返93.6美元。
個股方面︰
DWAC︰美國前總統特朗普嘅Truth Social正式於App Store上架，推高DWAC股價升過6成，後收窄到2成，目前只限美國地區下載。
AMD︰盤前最活躍成交之中，唯一一隻有得正數，升0.6%至114.3美元。原因相信係淡友Bernstein轉性，10年來首次叫買，提高評級至outperform，又直認係最大錯失。
分析師指AMD估值大約係30倍未來12個月EPS，或者係講緊好大可能未來有EPS$5，即係20倍估值左右，接近5年來最平時機。
