隔晚美國總統拜登宣佈首階段針對俄羅斯制裁政策，市場理解為相對輕輕落墨，俄國就甚至宣稱普京開緊會，無睇記者會直播。市場氣氛由谷底反彈，3大指數期齊齊向上，標普500指數有望暫時守住1月尾底位4,300點左右。
經濟數據方面，IHS Markit美國2月採購經理人指數 (PMI) 初值57.5，製造業PMI好過預期56，亦都較1月55.5反彈。
至於個別被視為相對安全板塊，喺業績後雙雙引爆地雷，Home Depot(HD)第4季季績交出每股盈利3.21元，稍勝預期3.18元。不過焦點落在毛利率下跌，第4季33.2%，較上年同期跌35個點子。
再加上HD預視2022財年增長有限slightly positive，毛利率持平，盈利增長低個數。HD股價大跌9％，錄得自2020年最大跌幅。
另一邊，農業化工股Mosaic(MOS)公佈第4季業績，每股盈利1.95元，差過預期的1.98元，股價插水逾5％。
主要原因為銷售量低，包括係第4季Potash只賣到210萬噸，遠低於上年同期270萬噸。MOS最終只係得益於售價增加，令收入增長42％，無想像中的價量齊升。
利伸︰有MOS，對倉位帶來-1%影響，開市後決定斬唔斬。
從上述兩個例子幾反映到美股目前無乜真正安全板塊，連最近油價亦無所謂受惠國際衝突，其中OXY高開後4%後要收跌3%。
最後，要一提市場觀察，網絡安全軟件股企得幾硬淨，值得留意往後走勢。加上最近美國政府提醒企業，提防俄國以網絡攻擊報復制裁。
