隔晚美股喺俄羅斯收兵消息後飆升，不過事件後續為各說各話，由尋晚至今，美國拜登表示俄羅斯入侵烏克蘭仍然有可能﹔北約NATO亦都講緊威脅持續﹔烏克蘭就仍然堅持想加入北約，而且話未見俄羅斯撤退。
至於俄羅斯就堅持北約要書面聲明，拒絕烏克蘭加入組織，同時駐EU大使就話俄烏之間衝突唔會升級。
另一邊，生產者物價指數PPI按月升1％，高過預期的0.5%，數據反映緊生產者通常會轉成本轉嫁去消費者，通常被理解做預期通脹繼續高企。從股市初步反應去睇，似乎開始麻木。
Nvidia業績preview
納指如果今晚企得穩的話，有望收復上周五支大陰燭。反彈市主要動力，來自晶片股，Nvidia業績前炒起升9%，對於截至1月31日的Q4預期，市場睇收入74億，按年升48%﹔經調整每股盈利1.23元，對比上年期0.78元，上季則為1.17元。
來年截至4月底的Q1，市場預期NVDA指引要有73億收入，經調整每股盈利1.19元。
Airbnb業績
再望望交代業績後繼續升嘅Airbnb，值得留意係本輪反彈之中，旅遊相關板塊相當強勢，屬於增長股科技股的Airbnb都距離52周高位只差10％。
實際數字，ABNB的Q4收入增長78%至15.3億，勝預期14.6億﹔淨利潤5500萬，對比上年輸39億﹔EPS 0.08元同樣好過預期嘅0.03元。
望返Q4數字，唔計亞太地區，Airbnb訂房及體驗數字超越2019年同期8%。Airbnb話Omicron影響比起Delta細得多，預訂及取消數字都較預期正面。特別去睇12月訂房數字可以見到，比較2020年升逾40%。
預期來年生意，歐美訂房數字已經超越疫情前，拉丁美洲需求強勁，惟獨係亞太地區無乜起色。
