政府喺《五年規劃》入面話,想擴大人民幣喺香港嘅使用場景,包括公務員去內地培訓、同埋買東江水直接用人民幣結算。消息一出,即刻有人開始杞人憂天:「咁搞法會唔會削弱港元地位?會唔會好似澳門幣咁,慢慢畀港幣『食』埋?」坦白講,呢啲擔心真係想得太多。
前陣子喺雅辰會同幾位Banker食飯吹水,大家講起呢個話題,一致贊成政府應該喺適當環節多用人民幣結算。原因好簡單,用最基本嘅經濟學道理就解釋得到:貨幣唔使換嚟換去,最直接嘅好處就係慳交易成本。
諾貝爾經濟學獎得主高斯(Ronald Coase)早就講過,匯率轉換本身就係一種「摩擦成本」——銀行要收Spread(差價)、收取手續費,企業同政府仲要花時間同人力去睇住匯率波動、做對沖風險。歐元區當初成立嘅核心原因之一,正正就係為了消除呢啲不必要嘅經濟摩擦。
除了東江水,睇下現時嘅公營房屋項目,好多MIC(組裝合成)組件同建築材料本身就係喺內地採購同生產。直接用人民幣結算,邏輯上唔係好合理咩?何必先將港幣換成人民幣,中間白白畀銀行食兩次手續費?
從政府收入嘅角度嚟睇,道理完全一樣。內地人才申請高才通、專才計劃嘅行政費用,又或者係內地買家喺香港買樓交嘅印花稅,點解唔可以設特別渠道直接收人民幣?政府收到人民幣之後,正好用嚟支付東江水水費同MIC合約,兩邊直接對沖,連最後嗰少少換匯成本都慳埋。
至於有人酸溜溜話「港幣遲早畀人民幣食埋」,大家都不過一笑置之。港元嘅地位同法定權利,係由《基本法》第111條明文保障嘅。喺香港境內,所有日常零售、發薪、政府徵稅同公共服務,依然並且必須以港元做主要法定貨幣。政府向內地買水、買建築物料改用人民幣,本質上只係一項普通嘅「跨境外匯交易」——呢啲同我哋向美國買嘢付美元、向日本採購付日元完全冇分別。
港元嘅價值同信心,背後有龐大嘅外匯儲備做100%後盾,並由運作成熟嘅聯繫匯率制度支持,絕唔會因為政府某幾項特定開支改用了咩貨幣結算而有所動搖。只要聯匯制度運作正常,港元對美元繼續維持喺 7.75 至 7.85 嘅區間,港元嘅根基就穩如泰山。
香港而家面對嚴峻嘅財政赤字,政府理應「應慳則慳」。東江水、MIC建築合約、人才申請費、印花稅……凡係直接同內地往來嘅項目,適度引入人民幣結算,既可以幫庫房慳到真金白銀,喺理論上正確、實務可行、法律上面都完全站得住腳。面對大勢所趨嘅商業智慧,真係唔使再同自己過唔去。
曹老闆
註:專欄作家言論不代表本網立場


