最近英國有班人搞咗個好得意嘅聯署，大約120個自稱「愛國百萬富翁」聯名寫信畀新任首相貝安德，話「請加稅啦，我哋付得起」。佢哋主張對淨資產超過1,000萬英鎊嘅部分每年抽2%財富稅，話可以每年多收240億英鎊。聽落好高尚，好愛國。不過曹老闆睇完就笑咗出嚟——呢班人真係富豪？定係一班中產玩票式站台，專門嚟奉承工黨嗰套「打富人」思維？英國脫歐之後富豪外流已經嚴重到咁，佢哋仲喺度推多一把，係咪真係想害英國？
當然有人反對。英國財政研究所（IFS）一早講過，年度財富稅根本解決唔到不平等，設計困難，仲會嚇跑國際流動嘅超級富豪，令人寧願消費都唔投資。經濟事務研究所（IEA）指出歷史經驗清楚，法國、瑞典、德國都試過，最後多數廢除，因為行政成本高、抑制投資、資本外逃，淨收入有限。稅務專家Dan Neidle 更直接話呢啲方案係「民粹廢話」，模擬顯示收入脆弱，長遠可能拖累GDP 2至5個百分點。Adam Smith Institute 同其他自由市場智庫都話，聯署誇大支持度，歷史證明呢招對經濟增長有害。主流經濟學家多數唔買賬，只有少數左翼學者撐一個更窄嘅版本。
更現實嘅問題係，英國脫歐之後富豪外流根本已經好嚴重。根據Henley & Partners 同New World Wealth 嘅數據，2016年脫歐公投係轉折點，英國由以前吸引富豪變成淨輸出，到2017至2023年累計淨損失大約16,500名百萬富翁，2024年再淨走10,800人，2025年估計再走16,500人，成為全球流失最多富豪嘅國家。英國係主要成熟經濟體中唯一百萬富翁人數下跌嘅地方，其他國家平均升4成。頂級富豪更明顯，2024年就有78個億萬級同12個億萬富翁走佬。去邊？杜拜、意大利、瑞士、新加坡最熱門。點解呢班聯署嘅人唔面對呢個問題？舉個例，英國電器首富、風筒同吸塵機大王詹姆斯·戴森，2019年已經將公司總部由英國搬去新加坡，自己都有幾年當過新加坡居民。雖然2021年個人居所改返英國，但總部繼續留喺新加坡，家族投資公司近年仲將大量資金轉過去。富豪一走，投資少咗，工作機會少咗，資產唔再放喺英國，滴漏效應自然消失。政府再加稅，只會令更多人走得更快，到時稅基更細，得不償失。
其實呢個世界有樣嘢叫做慈善。好多稍為有少少錢嘅人，都鍾意自己針對性幫手——捐學校、建醫院、扶植創業，直接幫到有需要嘅人，又唔使經過政府層層官僚浪費時間同金錢，仲可以創造就業。戴森自己都一路做緊呢啲，捐錢擴建小學、投資本地項目。政府真正應該做嘅，係鼓勵慈善，畀多啲免稅優惠，令有錢人更願意主動貢獻，而唔係用強制收稅嚇走人。一刀切強制抽財富稅，聽落好公平，實際可能令英國愈嚟愈窮到燶。呢班「愛國百萬富翁」如果真係咁愛國，不如自己寫張支票先，再慢慢講道理。否則呢招，只會令英國呢個以前嘅日不落帝國變成日落閉翳國。
