特朗普早兩個月喺霍氏新聞接受兒媳Lara訪問嗰陣，已經低低調調認咗低威：「你睇吓伊拉克點解搞得咁差，根本一開始就唔應該去嗰度，伊朗都係一樣，本來唔應該插手。」原文就係咁講。不過呢啲認低威嘅說話，傳媒唔多提，因為承認美國已經輸咗一場仗，始終唔好意思講出口。而家成場美伊拉鋸，美軍航母喺波斯灣曬太陽，伊朗照樣封住霍爾木茲，美國明明已經輸咗，只係死撐唔肯講。
最近特朗普又拋出「伊爆論」，話有三種戰略，其中一種係「坐觀伊朗經濟崩潰」——通脹300%、貨幣一文不值、兵都發唔到糧，咪等佢自己爆。香港人一聽就似曾相識，以前都有人講過類似「等佢自己爛」嘅理論，結果係點自己明啦。特朗普嘅方法真係自相矛盾到笑死人：當初伊朗掌握民用核技術，咪就係美國幫手教？因為當時有個更大敵人叫伊拉克。後來伊朗唔聽美國之笛，制裁咗半個世紀。而家你又想佢經濟爆，唔知要再等多幾個世紀先至見到成果？人哋係波斯文明大國，係少數打贏個羅馬嘅國家，後來拿破崙想打印度都係要同佢簽約借路行而唔係同佢鬥，呢個民族嘅能力好強勁。
而且特朗普口口聲聲話軍火庫存冇問題，美國正在「好似癲咁」生產。但消息傳出，航母上面啲大兵哥寧願跳海自殺，都唔想繼續喺個熱到死嘅海受虐待。呢班Z世代，唔好講熱辣辣船艙瞓碌架床，連有冷氣嘅寫字樓都唔願坐得耐。美國而家國債利息高企，國防開支又大，兩條數一加埋，聯儲局新主席沃什講縮表都唔敢大聲，怕左市場即刻嚇到縮水。
仲有，特朗普最新又搬出《交易的藝術》嗰套談判哲學，講白咗就係開天殺價。而家要追返伊朗「賠償」，連幾十年前一啲唔係好關佢事嘅舊帳都搬出嚟逐項傾。人哋伊朗捱苦捱慣咗，你就慣咗嘆世界，結果點樣，大家心知肚明——傾嚟傾去，時間就係籌碼，拖得愈耐，美國國內壓力愈大。
你繼續封鎖伊朗，地球每日就少咗大約四百萬桶石油供應。呢排係有講過話想喺阿曼起個貨櫃碼頭直接出海唔使經過霍爾木茲海峽，轉頭伊朗即刻同阿曼有密密傾偈，呢啲碼頭大計都唔係咁易做落去。霍爾木茲海峽一旦繼續封死，下半年油價飆返100美元一桶唔出奇，跟住通脹、石油副產品、農業成本，傳導效應會出晒嚟。等埋11月中期選舉，伊朗可能總會送個「大禮」。小股民唯有買下中石油對沖吓啦！中國石油儲備相對堅挺，有幾多真實底牌，始終冇人知得清。
