最近同財經界老友們提起JPEX，不外乎品評吓呢個「搭雞棚」過程有幾優質。自問亦冇資格去評論技術層面，皆因專注範圍不涉及呢個界別。不過，從投資者心態方面、又或者寫股評嘅過程，多少有值得自我警剔之處，要對自己多加點要求。
喺缺乏監管下，JPEX孕育一單近14億元嘅大案，相比港股魯大師（3601）離譜嘅特別息彈弓手，主要股東們玩咁大，先至能夠沽股套現得嗰幾千萬，證明港股呢個場真係連大戶、莊家都冇啖好食。
港股衰三年、「半衰期」更達十五年，流通性同大陸樓市同樣乾涸，個場冇魚，莊家搭雞棚都嘥氣。至於加密貨幣市場予人感覺長玩長有，亦證明，其實香港真係有大把「靚魚」，只不過港股市場儲唔到魚係自身唔爭氣，未能說好香港故事。
魚嘅質素，冇因為呢十五年而改變過，同樣「優質肥美」。小弟睇完一系列JPEX苦主訪問，發現被騙總有充分理由，怨KOL影響力大、怨證監未及時提醒⋯⋯小弟相信，即使冇呢啲理由，只要你係「靚魚」，騙徒實捉到你。
訪問當中，有一位苦主自稱喺JPEX曾坐擁最多2000萬資產，反映苦主直到被訪問一刻，仍然覺得自己曾經擁有2000萬嘅所謂「真資產」。呢種思維，絕對會種下再次被騙嘅禍根。
上述嘅苦主思維套用喺股票市場上，輸完一次通常有下一次。檢討自己嘅trade，想辦法提高勝率、回報，減低drawback幅度，盡量趨吉避凶，先至對得住自己嘅真金白銀。
至於JPEX案中KOL嘅角色，只不過是傳銷過程嘅上線，永遠存在。要佩服嘅係，林作仍然投入自己場好戲，盡力令自己成為一個「免責」嘅上線。
苦主們搵理由蓋過自己嘅失算，又或者將自己全身而退嘅機會看成近在咫尺，可能係一時三刻未能接受被騙鉅額、不能無地自容，假若佢哋長期沉溻喺被害思維之中，遲遲未能放低自尊面對自己，佢哋嘅身份只會係魚，有資產就繼續做靚魚，又有可能係瘦咗一大截嘅魚，唔難出現二次三次中伏嘅機會。至於林作對於「最成功嘅失敗者」美譽嗰種沾沾自喜，「事情已發生，就要面對」嗰種另類積極態度，換句話說，只要有機會，林作仍然會再充當上線嘅角色。
上線、下線嘅故事，只會繼續循環，一步步淘空香港人嘅財力。JPEX案涉及金額近14億，除返開香港人平均損失近兩嚿水，相等於小弟二口子出街食少餐、寫少一篇食評。香港經濟前景黯淡，今後仲要捱好多年，希望大家設法保住自己財力，好讓苦日子較易捱得過去。
晉佳
https://www.facebook.com/advanceguy1
註：專欄作家言論不代表本網立場
