因應新冠變種病毒Omicron在香港蔓延，行政長官林鄭月娥今日（5日）舉行記者會，形容第五波疫情將一觸即發，並宣佈收緊防疫措施，並於本周五（7日）起凌晨零時起實施，為期14日。政府7天後會檢視措施，而「疫苗氣泡」則於下月24日才擴大。
收緊防疫措施包括：
1.禁止食肆晚市堂食及收緊入座人數
晚上6時後至早上4:59分不能堂食。在非晚上堂食時間，B類食肆每檯上限減至2人、C類食肆每檯上限減至4人、D類食肆每檯上限減至6人，顧客數目上限維持不變，有表演或者麻雀活動則需暫停。
2.關閉處所
包括酒吧、浴室、健身中心、體育場所、泳池、遊樂場所、美容院、卡拉OK、主題樂園、博物館及戲院等。
3.暫停本地遊及公海遊活動。
4.取消所有大型活動
包括大型本地漁農美食嘉年華、香港單車節，另外張敬軒演唱會自1月6號起取消
5.暫停進入高風險地方
包括暫停探訪醫院及院舍
歌手張敬軒IG回應。
對於政府再次收緊防疫措施，各界人士大多感到不便及抱有憂慮。
張敬軒演唱會苦主──中環十一少：
原本買了7號張敬軒演唱會飛，希望可以適時交代後續安排，給予觀眾選擇退票或回水，不過現在就已不用再擔心我的嘉賓是暗星了。
餐廳食肆苦主──荃灣和順記老闆阿政：
生意會大減三分之一呀！夜晚啲人冇得去打邊爐，亦可能會去返我哋餐廳買外賣，但都係危多於機，未來會加強外賣、減價促銷，同埋裁員。
食客苦主──財經專欄作家千頌C：
而家啲餐廳本身已經好難book，千辛萬苦book到，然後又要冇得食！唯一好彩嘅係，我趕得切睇張敬軒演唱會。
食客苦主──蘇先生：
好唔方便，其實唔只冇得食飯，有時同朋友去玩嘅場所都禁埋，冇晒社交。疫情初初爆都仲話合理，而家措施又去返兩年前，係咪代表搞咁多嘢其實都係原地踏步？
健身苦主──亞洲運動及體適能專業學院運動公關邱益忠：
業界就好擔心啦，因為上年3、4月之後就冇停業，之後見健身同運動業界就發展得好蓬勃，香港gym room數量已有1189間，比2019年多咗21%。雖然政府想疫情受控，但對於健身中心有個疑問，係咪可以同食肆一樣，6點後先停業？健身運動業界一年收入36.6億，每停業一日就係冇1,000萬生意，14日就1.4億，對業界員工生計都好大影響。至於我啲肌肉點算，都大鑊㗎，真係唯有自己屋企做多啲。
健身苦主──股評人杜昇：
冇波踢，冇Gym做，恐怕會肌肉萎縮，食慾不振，精神不濟，慢性死亡。
健身苦主──香港股票分析師協會副主席郭思治：
兩個字，痛苦！因為對一直做運動的人嚟講好唔慣，宜家只可以喺屋企做啲簡單嘅運動、或者去停車場、空地跑吓步，練吓氣……疫情期間冇辦法啦，呢個都係我哋嘅責任。
發展商──恒地、會德豐地產
售樓處將如常開放，繼續做足防疫措施。限制每組參觀客人及代理不多於4人進入展銷廳。
