內地電商巨頭京東（9618）繼續燒銀紙強勢攻港，睇住本港競爭對手來打，推出「京東超市日日8折」搶客。京東港澳在社交平台發文指，「只係比85折？咁樣真係有啲孤寒」，雖然帖文未有指名道姓，但明眼人就知道是誰，事關本地龍頭HKTVmall近日推出85折優惠。
HKTVmall早前推出85折大型優惠，集團副主席兼行政總裁王維基聲稱自己：「30年前起家時已打減價戰」，又指HKTVmall坐擁數十億流動資產，沒有負債，每年EBITDA淨賺3億元，「我就要睇吓邊個先投降」。
京東即搬出8折還擊，兼在字裡行間暗諷HKTVmall。京東港澳發文指出，「賺咗香港人咁多年錢，竟然只係比85折？咁樣真係有啲孤寒」，並指「既然要平，就梗係要平到盡」，宣佈京東超市推出「日日8折」優惠，「唔使湊夠幾百蚊，買滿100元即減20元，買滿99元即可免運費送上門」。
HKTVmall回應本地傳媒查詢時指，過去周末的85折優惠活動只是減價戰的起點，未來會每星期甚至每日推出不同的優惠，並會因應市場情況及客戶意見，適時推出更多具吸引力的活動，又強調多年來一向無懼競爭，並相信所有競爭都有助推動香港電子商貿整體發展。
值得留意的是，自京東攻港以來雙方已多次爆發口水戰，先係去年王維基寸爆京東App抄足HKTVmall八、九成，以及「買貴就賠」唔包HKTVmall，之後京東就趁HKTVmall母企香港科技探索 （1137）公佈業續後深夜發文贈興，表示「恭喜」HKTVmall 毛利率逾25%，稱京東自營毛利率只有10%左右，反問「大家覺得邊個平啲呢？」
