法國總統馬克龍訪問中國,唔難重單止遊覽晒成個中國嘅發展大城市,仲得到最高格調嘅招呼。佢竟然用廣東話同廣州嘅大學生打招呼,可以話喺世界舞台上邊省靚咗中國嘅招牌。當然臨走嘅時候帶返法國嘅空中巴士合約,都真係好和味。但其實馬克龍今次嘅表態,開展咗全新嘅世界格局。
其實世界上能夠大量生產民航客機嘅航空企業唔係咁多間,法國嘅空中巴士同美國嘅波音一直都係叮噹馬頭。不過早喺2007年,法國就已經將空中巴士嘅總生產線開設咗喺天津,仲係第一條離開法國嘅大型生產線。只不過今次嘅合約係擴充第二條生產線,當然生產嘅飛機主要都係賣返畀中國,所以呢份合約只係反映咗中國對自已未來經濟發展充滿信心,對民航客機嘅需求有增無減。
睇返喺疫情前嘅數據,世界十大繁忙客量機場,香港都只不過排喺北京同上海之後,美國上榜嘅都只係有亞特蘭大、洛杉磯同芝加哥。如果未來中國嘅民航客機發展速度同高鐵嘅速度有得比嘅話,隨時十大繁忙機場佔咗八個都唔定。咁樣法國嘅空中巴士又點唔會睇準呢個潛力龐大嘅市場。
馬克龍上任總統嘅開頭,好多人都睇唔好佢,冇乜政治嘅歷練同埋太過年輕。點知呢幾年佢處理法國內部嘅糾紛都有政治高超技巧,好似要延長退休年齡、減少福利開支,呢啲咁棘手嘅方案都俾佢過到,真係唔好睇小佢嘅政治智慧。佢離開中國嘅時候話,法國唔會喺中美兩個大國之間企喺任何一邊,其實五眼聯盟一直都冇法國份,唔靠邊站,逐單清算,將會成為國際關係嘅新常態。
嘈老闆見唔到馬克龍,不過就喺中環香港會見到法國前總理多明尼克.德維勒班演講,佢退咗休當然唔係好講政治,但係就講咗文化交流中間,未來香港同中國嘅角色。當然要試吓香港會出名嘅牛扒同埋甜品,不過就冇嘆到法國紅酒,真係有啲可惜。
曹參國
註:專欄作家言論不代表本網立場