香港嘅樓市都沉悶咗好一段時間，無論係樓市裏面嘅邊個板塊都好似溫水煮蛙，搞到個個冇晒心機。點知突然出現一個十月驚奇，香港股票市場大振作，樓市又點會唔跟住升啊！咁你睇兩個龍頭地產商點樣定價一手新樓，就肯定會知道個趨勢係點。
好似新鴻基地產喺啟德嘅天璽‧天買到第三輪啦，有啲單位加價8%。喺施政報告再幫樓市鬆綁之後，另一大老長實三個項目都有現樓，用價單方式賣貨尾，仲加價3%。香港兩大龍頭地產商相繼加價，咁唔係證明咗樓市已經見底嘅最好信號，睇嚟樓市穩步上升都係一個趨勢。
另一個更加活靈活現嘅訊息，就係魚翅撈飯再次重現。我嘈老闆同老友去潮州伯樂食老虎翅，點知唔訂枱都差唔多冇位坐。股票市場升得咁快，出咗貨梗係開心到飛起，隨時攞舊首期去買樓，呢啲咪就係以前香港繁榮穩定嘅表現囉。
最緊要係施政報告終於撥亂反正，唔再係十幾年嚟咁樣，將買樓收租當咗係好似做賊咁，又唔俾做按揭，又話要同入息比例睇到好緊。而家放鬆晒呢啲限制，唔單只係延續今年財政預算案嘅時候撤銷樓市辣招印花稅嘅原則，更加係根本改變返香港嘅樓市，可以話回歸到去自由市場，咁樣又點會唔係樓市嘅絕好訊息。
其實銀行借唔借貸款按揭，呢啲都係好複雜嘅一籃子因素，官員自己喺冷氣房指指點點，教銀行家點做生意，呢個係香港啱啱攞咗全球自由經濟第一嘅最大諷刺。市民大眾買唔買樓就更加複雜，可以有個富爸爸，或者有個富貴男朋友，亦可以中咗六合彩，炒加密貨幣發咗達，其實好多時候同個人入息都未必有好直接嘅關係，但係過去咁多年就係阻住唔俾正常人做按揭。
再加上美國經濟唔係咁好，唔單止打劫幾百蚊報警都唔受理，仲要幾個鐘頭成幾十人去搶劫火車裏邊嘅貨物，警察都後知後覺，咁真係反映當地經濟蕭條，啲人鋌而走險走去打劫都唔會打工。咁樣美國聯儲局就一定係會繼續減息落去，谷返起佢哋當地嘅經濟，香港都會跟得好貼減息，對於買樓收租嘅人就更加會喜上眉梢。
因為一般收租都係大概3%嘅回報率，之前高息到五厘六厘，仲有邊個人會去投資物業？而家施政報告又放寬埋公司持有物業嘅限制，咁樣係令到投資市場資金重新考慮磚頭，對於住宅一定有提振效果。
我班老友一面食住高湯魚翅，一邊高談闊論，呢次施政報告最威水就係唔再仇恨富貴，俾啲投資移民買樓當做投資項目，咁樣先至係口徑一致。明明想啲富豪嚟香港住，梗係想佢哋買樓啦，之前嘅做法真係令人摸不着頭腦。有人認為只會有豪宅市場受惠，不過房屋板塊雖然好多，但係層層相扣，點都會有漣漪效應，香港嘅樓價將會係見底回升。
曹參國
註：專欄作家言論不代表本網立場