香港運動員喺國際體育活動攞獎播錯國歌嘅事件越鬧越大，香港有政客仲話要喺立法會運用特權法傳召Google來解畫，唔嚟就會出傳票或者罰錢。查實香港如果定位係做一個國際化嘅經濟城市，最好就唔好介入跨國政治糾紛。香港做生意嘅商人最識得呢個道理，無論喺回歸前同回歸後都搵到自己嘅定位。
李家超特首搞咗個特首政策組，到而家都未請到人，話晒要有國際視野又得到國家信任，呢類人都未必肯搞政治。好似同Google開拖，香港有啲人就真係太過「太簡單，有時太幼稚」。唔好講Google嘅法律團隊係全球嘅精英，佢哋每日面對嘅官司同投訴多到數唔到。
俄羅斯就係其中一個啄住Google嘅國家，舊年都未打仗就已經罰咗Google成7億幾港元要去移除YouTube短片。當然Google當佢冇到，同烏克蘭開拖之後，俄羅斯喺今年中就更加碼罰咗21億港元，雖然Google講到因為戶口凍結而冇錢出糧畀俄羅斯嘅員工，但係嗰啲俄羅斯唔鍾意嘅YouTube短片仍然日日喺度播。
香港呢個750萬人口嘅地方，係咪真係準備好用納稅人嘅錢同Google打法律戰？先唔好講Google反擊起嚟嘅公關戰可以令到香港說好故事嘅效果全部抵銷，最終極一招撤出香港市場，大家嘅Gmail又係咪已經backup咗？聽聞一啲原本活化工廠大廈成數據中心嘅大刁都hold住咗，話要觀望吓呢件事嘅發展。呢次隨時變成呢一屆政府嘅第一次政治危機。
上個禮拜曹老闆去咗上市公司商會喺君悅酒店嘅晚宴，台台都係生意人，雖然財政司陳茂波嚟現場演講，財庫局局長同埋副局長都俾面坐足全場，但係就唔多見其他政治人物，呢個朱太創辦嘅商會真係識得實踐做生意唔好搞政治嘅道理。
前菜嘅蟹肉夠新鮮有蟹味，配牛油果同甜椒夠晒健康。仲有一個前菜係日本半熟蛋上面加上黑松露同牛肝菌，入口淡中有濃。反而主菜烤鱸魚同帶子鮮蝦就只算合格，甜品杏仁朱古力就唔夠鬆軟。香港今年IPO集資額只係全球排名第四，比南韓超越咗，如果俾個好靚嘅理由Google出終極一招，唔做香港呢個細細市場嘅生意，仲點吸引海外企業嚟香港上市啊？
曹參國
註：專欄作家言論不代表本網立場
