Site icon BossMind Media

嘈老闆IG|俄羅斯富豪遊艇游走之謎|曹參國

俄羅斯鋼鐵大王的超級遊艇停泊香港,就算船員沒有落地消費,單是遊艇入油都算帶動經濟。可惜香港今時今日好難再做亞洲嘅瑞士,因為連歐洲嘅真正瑞士,都已經企埋喺西方列陣,搞到瑞士嘅私人銀行通通擠提。想喺中美角力之間獨善其身,真係唔係咁易,所以俄羅斯富豪遊艇都冇再停喺亞洲其他城市,直接開去非洲南非,都唔知要環遊世界幾耐。

香港從小漁村到國際金融中心,就係食住四方飯,喺第二次世界大戰嘅時候,德國公司仍然可以喺香港正常營運,呢個就係自由開放嘅胸襟。可惜而家啲列強大國郁吓就話要制裁,就算想幫俄羅斯隻遊艇入油,油公司都心慌慌。

呢排中環人人都講點樣吸引人才,計我曹老闆就話點算吓香港有幾多超級遊艇,就知道香港仍然係咪有魅力吸引人才。香港境內就有235個島嶼,風光明媚,天然資源豐盛,淨係香港後花園西貢區,喺西貢東郊野公園糧船灣至果洲群島一帶嘅六角形岩柱群,就剛剛獲國際地質科學聯合會公佈入選首100個地質遺產地。呢啲天然資源可以話全世界冇另一個金融中心可以媲美,新加坡連想行山嘅天然山丘都唔多個。

講開西貢,就唔能夠唔講有個著名食海鮮嘅漁村,100年前就已經係香港重要嘅貿易小鎮,而家就有兩間海鮮店招呼世界各地遊客,呢度就係布袋澳,喺清水灣俱樂部同古蹟大廟附近。

我曹老闆就剛剛去布袋澳海鮮島酒家同佢哋嘅高老闆傾偈,原來疫情期間開遊艇去布袋澳食海鮮嘅人少咗, 0+3之後更加去晒外國消費,而家去食佢哋著名嘅墨魚刺身同龍蝦象拔蚌就真係隨時食到好嘢。所以千祈唔好趕走啲富豪遊艇,應該歡迎全世界富豪都嚟香港。

Exit mobile version