內地電商巨頭京東（9618）近期燒銀紙強勢攻港，劍指本地龍頭HKTVMall，被HKTVMall創辦人王維基寸爆其App抄足八九成，以及「買貴就賠」唔包HKTVMall後，雙方持續爆發口水戰。昨日HKTVmall母企香港科技探索 （1137）公佈業續後，京東深夜發文贈興，「恭喜」HKTVmall 毛利率逾25%，稱京東自營毛利率只有10%左右，反問「大家覺得邊個平啲呢？」
不過，不少網民力撐王維基，在京東的帖文下留言斥其「流氓生意手法」，認為「其實講返自己平台咪得囉。做生意唔係踩低人地抬高自己。 如果用踩低人既手法只會顯得無品」，另外亦有人提到「一個網購平台毛利率高唔等於暴利，仲有廣告收入+投資」，「毛利率低可能係你成本控制同盤生意run得差，唔一定代表你對客好」。
另外，至維基昨日在業績會上表示，打從心底裏歡迎內地電商來港，又指HKTVmall每天都在打價格戰，未來將引入更多商戶，包括內地商家，為消費者提供更平價及優質商品，以及計劃加強「街市即日餸」服務。同時，HKTVmall宣布自4月1日起，將會移除所有訂單的自取門檻。
